如果講到即時 message 軟件，WhatsApp 在港人最愛的 APP 榜上肯定是三甲之內。不過小編發現身邊朋友來都只係純通訊而無用盡入面的功能..
第一招：為慳 data 拒自動接收相、片
現可用平台：iOS
相信大家都知道 WhatsApp 會自動 download 朋友
send 俾你的相、片等多媒體檔案，好處係當大家打開 WhatsApp 的時間就可以即刻睇到，但在呢個有限 data plan
的年代，遇上乜嘢都亂 send 亂 forward 一番的朋友，有時真係欲哭無淚，因為「有涯」的 data
就係「無涯」的垃圾信息中浪費掉了。要防止呢種悲劇，只要在 WhatsApp
的設定內面關閉「儲存接收多媒體」就可以了。不過要留意，呢個設定暫時只有 iOS 先有，Android 用家仍然要忍受垃圾相、片多一陣掛……
第二招：關閉彈出信息預覽免洩密
現可用平台：iOS、Android
每個人身邊總有幾個「八卦精」，出去食飯個時，萬一你去洗手間而唔記得拿
手機，而部手機又放了在飯檯上，萬一有人 WhatsApp
你，這些「八卦精」總會去裝你部電話，私隱咁就沒有了。其實只要在設定中，設定關閉「顯示預覽」（iOS）/
在「彈出通知畫面」設定中選擇「沒有提示」，再加埋個手機密碼鎖，咁就唔驚「八卦精」見到咩人 message 你同埋同你講咩啦。
▲iOS 平台上設定。
▲Android 平台上設定。
第三招：分享位置無難度
現可用平台：iOS、Android
有時約一大班朋友出街，但出到去又唔知點樣通知佢地係邊個位等，結果要逐
個以文字 WhatsApp 他們，都幾麻煩。其實 WhatsApp
除了可以分享相片影片之外，仲可以分享你而家的位置，只要選擇「分享位置」，而手機的 GPS 功能已開啟，就可以了。不過如果你是用
iPhone，記住為安全見，在分享後手動將位置分享功能關閉，咁就比較安全。至於 Android，手機內置就無得逐個 APP 揀係咪關閉「位置」/
GPS 功能，只能透過關閉「位置」去達到相近效果，但咁亦代表其他 APP 要用 GPS 個時又要開番，係比較麻煩。
▲iPhone 要分享位置，第一次的時候會詢問用家是否允許 WhatsApp 取用您的位置，此時點選「允許」，咁就可以分享現時所在地點啦。
▲為私隱起見，
最好用完之後入番 iPhone 本身設定的定位服務，然後在 WhatsApp
選擇「永不」，就可以關閉位置分享功能了。當下次再要用時，再次進入這位置選擇「使用 App
期間」就可以了。（懶的用家其實都可以慳番呢一步，因為其實 WhatsApp 只會係使用的時候開啟 GPS 功能，唔用個時理論上係唔會用的。）
第四招：無人知道何時「最後上線」
現可用平台：iOS、Android
大家還記得之前的「雙藍剔」事件嗎？對於小編來講，呢樣都唔係最苦惱的
時，就算女朋友睇唔到雙藍剔，但如果俾佢見到最後上線的時間比 send message
來的時間還要遲，但又唔覆「機」的話，後果可以好嚴重。所以為保自身「安全」，都係將「隱私」設定入面，將「最後上線」時間關閉，咁樣幾時上線都神不知鬼
不覺啦。
▲iOS 平台設定。
▲Android 平台設定。
第五招：自動備份信息無煩惱
現可用平台：iOS、Android
既然香港人應用 WhatsApp 如此頻密，相信唔少人的
WhatsApp
都儲存了成千上萬的信息、相片、影片等吧。平時可能覺得問題不大，但萬一手機壞了，又或者要換新機時，要備份過機就成為超煩惱的一部分。唔通真係要幫襯指
定電訊商的 WhatsApp「過機」服務？其實自己 DIY 一啲都唔難！只要按下面步驟去做就得了。
iOS 平台備份大法：
▲首先進入 WhatsApp 設定中的「對話設定」，然後選擇「對話備份」。
▲如果是第一次使用，要先手動備份一次，點按「立即備份」就可以將 WhatsApp 訊息、相片等備份到 iCloud 了。
▲第一次手動備份成功後，再在上一步的畫面點選「自動備份」，然後就可以選擇自動備份的頻密程度，小編建議每週備份一次，對一般人來講都足夠了。
Android 平台備份大法：
▲Android
平台 WhatsApp 備份大法就更簡單，只要進入 WhatsApp 的「對話設定」，然後點按「備份對話」就可以了。而要將 WhatsApp
backup 儲存在電腦，只要用 USB
接駁手機同埋電腦，然後直接將「Phone」內的「WhatsApp」文件夾整個抄走就得。自動備份方面，其實 Android 版 WhatsApp
預設每日凌晨 4 點都會自動備份，用家大可放心。
• 不想錯過新科技 ? 請 Follow unwire.hk FB 專頁 https://facebook.com/unwirehk/
